Нашир қилинган сана: 14.12.2020
Категория: Янгиликлар
Япониянинг машҳур “Balсom Co., Ltd” хусусий холдинги Ўзбекистонда комплекс ўғитлар ишлаб чиқарувчи йирик корхона – “Ифода” компаниясига 10 миллион АҚШ доллар миқдорида инвестиция киритадиган бўлди. Инвестиция доирасида бир қанча лойиҳалар амалга оширилади.
Тан олиш керак, хусусий компаниялар томонидан тўғридан-тўғри хорижий инвестициялар ҳали кам учрайди. Умуман бошқа йўналишларда ном қозонган, қишлоқ хўжалигига бегона бўлган “Balсom Co., Ltd” Ифода компаниясининг соҳада катта тажрибага эгалиги, унинг келгуси истиқболи ҳамда бозор муносабатлари шароитида жаҳон стандартлари талабига жавоб бергани, шунингдек, Халқаро сертификатларга эгалиги, маркетинг ва менежмент йўналишида ривожланган давлатлардаги каби иш юритиб келаётгани боис ҳамкорлик қилишга қарор қилди.
Маълумот ўрнида, “Ифода” йилига 100 минг тоннага яқин кимёвий воситалар ишлаб чиқаради. Ҳозирда 30 минг нафардан ортиқ фермерлар, 50 га яқин кластерларга хизмат кўрсатади. Ўтган йилги савдо ҳажми 211,1 млрд.ни ташкил қилган.
Компаниянинг асосий мақсади – хорижий инвестицияларни жалб қилиб, чет эллик ҳамкорлар билан икки томонлама манфаатли бўлган иқтисодий алоқаларни мустаҳкамлаш, экспорт салоҳиятини ошириб, дунё бозорига чиқиш ва албатта юртимиз иқтисодига муносиб ҳисса қўшишдир.
